نەك هەر بەشێك لە خەڵكی سادە، بەڵكو بەشی زۆری بە ناو شرۆڤەكارانیش بەهەڵەداچوون لە راوبۆچوونەكانیان دەربارەی خۆهەڵوەشاندنەوەی پەكەكە .
پەكەكە حزبێكە لە نێو چوارچێوەی مەنزوومەی بەرفراوانی كۆما جڤاكێن كوردستان-كەجەكە، ئەركی پەكەكە لە نێو بزووتنەوەكەدا داڕێژەر و ڕێكخەر و پارێزەری ئایدۆلۆژیا و فیكری سیاسی بزووتنەوەكەیە، دەبێ ئەوەش بزانرێت كە هەموو دامودەزگا و ڕێكخستنەكانی ئەو بزووتنەوەیە بە پەكەكەشەوە وەك حزب، ئەندامن لە نێو مەنزوومەی كەجەكە- كۆما جڤاكێن كوردستان.
هەر بۆ بەرچاوڕوونی، كەجەكە جیا لە خەباتی چەكداری و پەكەكە، بە قەدەر دەوڵەتێك رێكخستن، دەزگای مەدەنی، پەروەردەیی، سیاسی و ئابووری و …. هتد هەیە، خۆ ئەگەر هەلی یاسایی و دەستووری بۆ بڕەخسێت، دەبێتە دەوڵەتێك لە نێو دەوڵەتدا، كەجەكە پێكدێت لە:
– كۆنگرەی گەل، ئەركی یاسادانانە و بەرنامە و پەیڕو و پڕۆگرام دادەڕێژێت(شێوەی پەرلەمان)، لە نێوخۆیدا كۆنسەی بەرێوەبەرایەتی هەڵدەبژێرێت، لە ژێر چەتریدا، پارتەكان، كۆمەڵەكان، ڕێكخسنەكانی هەموو دەژەرەكان، كۆمیسیۆنەكانی سەربازی، ڕێكخستنی، كۆمەڵایەتی، ئابووری، سیاسی، دبلۆماسی، زمان-كولتوور، داد و …. هتد جێگەدەگرن.
– كۆنسەی بەڕێوەبەرایەتی و سەرۆكایەتی، ئەركی جێبەجێكارییە(شێوەی حكومەت)، كۆمیتەكانی سەربازی، سیاسی، رێكخستنی، دبلۆماسی و …. هتد، لە هەموو ناوچەجیاجیاكان كار و خەبات بەرێوەدەبەن.
پەكەكە وەك حزبێكی ئەندام لە كۆنگرەی گەل، لە نێوخۆیدا بەرنامە و پەیڕەوی ناخۆی هەیە، كڕۆكی فەلسەفە و ئایدیۆلۆژیای بزووتنەوەكەیە، سەركردە و كادر پێدەگەیەنێت، مەرجیش نییە هەموو ئەندامانی بزووتنەوەكە ئەندامی خۆی بن، چونكە بزووتنەوە بە گشتی بەرفراوانە، هەموو بیروباوەڕ، ئەتنیك، دەزگای مەدەنی و ڕێكخسنەكانی دیكەی نێو جڤاك تێیدا جێگەدەگرن.
ئێستا بابزانین لە ئەگەری هەڵوەشاندنەوەی پەكەكە چی دەگۆڕێت، ئایا بزووتنەوەكە پەكیدەكەوێت؟. بۆ ئەوانەی لە سیستەمی كەجەكە تێگەیشتوون وەڵامەكەی ئاسانە، نەخێر پەكیناكەوێت، چونكە سیستەمی كەجەكە بە پراكتیك كراوە و ئۆتۆماتیكی لە نێو هەزاران دەزگای بزووتنەوەكە وەك شێوازێكی ژیان و جۆری بەرێوەبردنی خەبات جێگیربووە، خەڵك بەگشتی قبوڵیەتی و بە تایبەت لە نێو خەباتی كوردانی باكور و رۆژئاوای كوردستان و رێكخستنەكان لە ئەوروپا پەیڕەو دەكرێت.
لەو دیرۆكە تێبگەن….
هەر لە گفتوگۆی نێوان پەکەکە و دەوڵەتی تورکدا، ساڵی ۲۰۰۲، پەکەکە وەک حزب خۆی هەڵوەشاندەوە، لە پێناوی فەراهەمبوونی ئاشتیدا ئاگربەستی یەکلایەنەی ڕاگەیاند، لەوەش زیاتر بۆ نیازپاکی دوو گرووپی گەریلای بە چەکەکانیانەوە ناردەوە ژێر دەسەڵاتی دەوڵەت، بەڵام کە دەوڵەت هەنگاوی پێویستی نەنا، گفتوگۆکە سەرنەکەوتوو شەڕ دەستیپێکردەوە، دوای دووساڵیش پەکەکە سەرلەنوێ دامەزرێندرایەوە.
- سەركەوتنی پڕۆسەی ئاشتی ئەو ڕیسكە دەهێنێت پەكەكە وەك حزب هەڵوەشێنرێتەوە، بەڵام مەسەلەی دەستبەرداربوون لە خەباتی چەكداری هەڵوەستەی جیددی پێویستە و دەبێ دوا هەنگاوی پرۆسەكە بێت، هەر واش دەبێت، تەنانەت ئەگەر لە كۆنگرەشدا بڕیاری دەستبەرداربوونەكە بگیردرێت، ئەوا پرۆسەی بە پراكتیك كردنەكە بە لانیكەم دوو ساڵی پێویستە، تا ئەو كاتەش هەموو نیازەكان و پلانەكان روون و ئاشكرا دەبن.
پەیامی ئەمجارەی بەڕێز ئۆجالان، دیسان دەستپێشخەریەکی هاوشێوەی پێشووە، ئەگەرچی لە پەیامەکەدا ئەو وردەکاری و مەرجە پراکتیکیانەی دەکەوێتە سەر دەوڵەت ئاشکرا نەکردووە، بەڵام بانگەوازیەکی ئاوا، بێ بەرامبەر و گەرەنتی نییە.
ئۆجالان تەنیا باری تەرەفی کوردانی لەسەر شان نییە، بەڵکو رەچاوی ڕاهێنانی هەستیاریەکانی دەزگا توندڕەو و ڕەگەزپەرستێتی تاکی تورکییشی کردووە
من بە تێگەیشتنی خۆم پێموایە ئەمجارەشیان ئەردۆغان و حکومەتەکەی لە نێوخۆی تورکیادا ڕووبەڕووی ڕیسکێکی گەورە دەبنەوە، بۆیە تا ئێستا بەڕەسمی و بە جورئەتەوە ناوێرن ڕوونکردەوەی پێویست بدەن، خۆ ئەگەر کارەکتەرە کاریگەرەکانی پشت پەردەی دەوڵەت ڕەزامەندیان لەسەر نەبێت، ئەوا تەنیا تاکتیکێکی حکومەتە و بۆ تێپەڕاندنی ئەو قۆناغە قورسەیە کە تێیدا دەژین
ئەوەش سەیر نییە، هەموو ئەوانەی نەیاری پەکەکەن دەستخۆشی لە ئۆجالان دەکەن بۆ پەیامەکە، زۆربەی ئەوانەش کە دڵسۆزی کێشەی کوردن، یان دۆست و لایەنگری بزووتنەوەکەن نیگەرانن و بە گومان و ترسەوە ئەو گۆڕانکاریانە دەبینن
لە هەموو بارێکدا، ئەوەی گومان هەڵناگرێت ئەوەیە کە ئەو بزووتنەوە ئازادیخوازییە کارێک ناکات بە زیان بکەوێتەوە، تەنانەت لای ئاساییە لەسەر تەنیا مەرجێکیش کە زیان بگەیەنێت، کۆتایی بە گفتوگۆکە بێنێت و ناکەوێتە داوی فڕوفێڵی بەرامبەر
ئەو پرۆسەی ئاشتییە، ئەگەر قۆناخێكی ئەرێنی ببڕێت و رێبەر ئۆجالان دەرفەتی سەربەستبوونی لە كار و خەبات بۆ بڕەخسێندرێت، خاوەنی توانا و هێزێكی وایە كە دەتوانێت ئامرازی زۆر لە پەكەكە بەهێزتر و كاریگەرتر بەكاربهێنێت، هەر دۆست نا، بەڵكو زۆرێك لە نەیارە كۆنەكانیش لە دەوری خۆی و كارەكانی كۆدەكاتەوە.
سەرەڕای ئەوەی هێشتا دیارنییە كە پرۆسەكە بە كوێ دەگات، چونكە سەرانی دەوڵەت و حكومەتی توركیا، بە تایبەت باخچەلی و ئەردۆغان بە گوێرەی پرەنسیپەكانی توركچێتی و یاسا و دەستووری ئێستای توركیا، ڕیسكێكی گەورەیان كردووە و هێلی سووریان بەزاندووە، ئەوان لە هەستیاریی دەستپێشخەرییەكەیاندا تێدەگەن كە دەبێ زۆر بە هۆشیارییەوە لێدوان بدەن و هەنگاوبنێن، گومانی تێدانییە ئەوەندەی كۆسپ و مەترسی لەسەر رێگەی ئەوان خۆیان هەیە، نیو ئەوەندە كۆسپ لەبەردەم لایەنی كوردی نییە، بۆیە ئەگەر لێرە و لەوێ لێدوانێكی نەخوازراویش بدەن، ئەوا هۆكارەكەی هەر ئەوەیە كە ترسیان لەنێوخۆی خۆیان هەیە، دەیانەوێت تەوازنێك ڕاگرن و هێدی هێدی خەڵكەكەیان بۆ بەرێوەچوونی پروسەكە ڕابێنن، بەو هیوایەی لایەنی دەسەڵات نەكەوێتە ژێر كاریگەری دژبەرانی نێوخۆیان لە پرۆسەكە و ناچاری پاشەكشە و لەفودەوران نەبن.
ئەوەی جێگەی دڵخۆشیشە و دڵنیایی دەدات، ئەوەیە کە ڕێبەر ئۆجالان و ڕایەدارانی پەکەکە زۆر لەوە وریاترن بە فڕوفێڵی دەوڵەتی تورکیا فریو بخۆن
